Suita SeaMonkey serbsce

Što je SeaMonkey?

SeaMonkey je naslědnik suity Mozilla. Team Mozilla bě hižo wotdawna rozsudźił, zo suita Mozilla so hižo dale njewuwiwa, město teje maja so samostatne programy Firefox, Thunderbird a Nvu wužiwać. Někotři přećeljo programoweje suity wšak su rozsudźili, zo nowu suitu wuwiwaja. Tuta nowa suita rěka SeaMonkey.

Stara suita Mozilla kaž tež nětko SeaMonkey stej programowej paketaj, t. r. wobsahujetej wjacore programowe komponenty. Tute komponenty su webowy wobhladowak Nawigator, póstowy program za e-mejle a diskusijne skupiny, adresnik, HTML editor a programowu komponentu za bjesadowanje. Na rozdźěl wot njeje su Firefox, Thunderbird a Nvu programy, kotrež su so specializowali. Firefox na přehladowanje w interneće, Thunderbird na e-mejle a diskusijne skupiny a adresnik a Nvu je samostatny HTML editor. Nimo toho je přidatnje kalendarowy program Sunbird, kotryž je so z programoweho rozšěrjenja Calendar wuwił.

Za instalaciju tutoho programa móžeće mjez archiwowymaj wersijomaj za Windows a Linux a rěčnym pakćikom wuzwolić. Archiwowej wersiji wobsahujetej dospołny zeserbšćeny program SeaMonkey. Z rěčnym pakćikom móžeće SeaMonkey na zakładźe druhorěčneho Seamonkey pozdźišo zeserbšćić. Nimo toho je rěčny pakćik njewotwisny wot dźěłoweho systema, tak zo móžeće SeaMonkey tež pod druhimi dźěłowymi systemami hač Windows abo Linux, kaž na př. Mac OS, wužiwać.

Oficielne webowe sydło za SeaMonkey je http://www.mozilla.org/projects/seamonkey. Tute strony su jendźelsce. Jeli chceće sej němsce informować, wobhladajće sej wotpowědne němske webowe sydło.

SeaMonkey je za wšelake dźěłowe systemy (Windows, Linux, MacOS atd.). Dokładny přehlad namakaće na http://www.mozilla.org/projects/seamonkey/releases/. Tam namakaće tež SeaMonkey w druhich rěčach.